燈櫈戥鄧！人臉識別系統 (Facial Recognition System)

超級市場最多係咩? 貨品? 除此之外呢? 就係數據 。識得用，其實好好用，可以帶嚟數十億嘅收入 。數據分析呢個 trends 已經係唔同行業嘅發展大方向，特別係快速消費品 (FMCG) 嘅行業接觸大量顧客數據，商家點樣利用 Data 產生數以億計嘅生意額呢?

相信你都有諗過，當你排隊準備比錢果時。旁邊總係放住細小嘅朱古力 、糖 、避孕套。之所以放喺收銀處位置，就係因為可以吸引到小朋友個眼球 ，繼而觸發產生攻擊 (包括楚楚可憐 、喊 ) 甚至乎襯唔為意，自己就攞咗比收銀姨姨。同樣地，買避孕套就等同買姨媽巾一樣咁尷尬 ，所以超級市場好貼心咁將佢放咗喺一個相當有利嘅位置 (只不過係太多選擇，唔知攞邊隻 ) 以本土絕技「擒拿手」將避孕套手到拿來 ，9秒9比錢走人。呢啲例子都係因為以往得出嚟嘅經驗話我哋知，演變成而家有科學根據地咁話我哋知。

大數據更加可以話我哋知咩貨品要放喺咩位置去增加購買意慾。擺貨嘅高度? 客人要唔要烏低身攞貨? 放幾多件產品喺同一個層架? 幾多星期轉一次? 呢啲決定背後都係一堆數據，而唔係隨喜，佛系擺貨法。

而家有一項技術，獲得最廣泛嘅關注及普及，就係人面識別系統。疫情過後，你仲想戴住口罩，避免被識別嗎? 

增加購買意欲

你個面孔唔單止提供有價值嘅數據。零售商更會收集由你個人產生嘅信息，儲存到資料庫。收集信息嘅渠道包括 online 或 offline，採用個性化、度身訂做、全方位根據你嘅口味自動推薦認為你需要嘅產品比你，繼而增加銷售。

安德魯·波爾（Andrew Pole）係一位數據科學家，佢能夠以一個女人嘅購買方式，揭示出佢係咪懷孕。

聽起嚟好勁，點做到?

呢位科學家當時因而被 New York Times 廣泛報導。

安德魯·波爾（Andrew Pole）做咗一連串測試，分析唔同嘅數據，發掘咗一啲有趣嘅資訊，例如乳液。波爾有一位同事注意到，女性喺懷孕嘅中期會開始購買大量無味乳液。另一位分析師則指出，喺懷孕前期嘅頭 20 個星期，孕婦會大量攝取鈣，鎂及鋅等補品。但係當女性突然開始購買大量無氣味番皂嘅時候，就表示已經接近交貨日期。

當波爾攞 Data 嘅時候，佢能夠識別大約 25 種產品。分析數據嘅時候，可以為每位女士分配一個 “懷孕預測” 嘅分數。更重要嘅係，佢仲可以預測到孕婦嘅生產日期，再推送非常精準嘅購物優惠卷比佢哋。

假設 Jenny Ward、23歲、居住亞特蘭大。今年3月開始購買大量乳液。根據波爾嘅推算，Jenny 嘅生產日期會係 8 月第 3 – 4 個星期。

另一個例子係涉及一名少女。呢個少女有日開始接收嬰兒推廣嘅電子郵件。當少女嘅父親得知嘅時候，佢怒氣沖沖咁去搵 email 嘅零售商講咗幾句說話。

少女父親：「我女兒收到你封電郵，佢仲讀緊高中，你係咪要鼓勵佢咁細個懷孕!?」

對方經理不知所以，望住電郵，確實係一封封嬰兒產品宣傳內容。為免進一步得罪少女嘅父親，經理選擇道歉。

第二日，經理收到少女父親嘅電話，講到：「我欠你一句對唔住，係我冇意識到我女兒嘅狀況。」

運用數據得宜有好處，相反、用錯咗會令你懞受損失。就好似呢個情況，如果我哋喺對方唔知情下祝賀對方，恭喜佢有咗，呢個可能會引起有啲人唔舒服。對於私隱，我哋要遵從數據嘅正確用法，避免做出一啲令人不安嘅事情。